Нөмрөгийн дархан цаазат газрын 79.8 хувь түймэрт өртсөн гэх урьдчилсан дүн гарч, хохирлыг үнэлнэ

Хохирлыг хиймэл дагуулын зураглал, газар дээрх хэмжилтээр тогтооно

МҮОНРТ-ийн мэдээлснээр Байгаль орчин, уур амьсгалын өөрчлөлтийн сайд Ц.Сандаг-Очир, Тусгай хамгаалалттай газар нутгийн бодлогын газрын дарга Ц.Уранчимэг нар Халхгол суманд ажиллаж, түймрийн хохирлыг үнэлэх талаар холбогдох албан тушаалтнуудад чиглэл өгчээ. Халхгол сумын Засаг даргын захирамжаар байгуулагдсан ажлын хэсэг болон яамны мэргэжлийн баг хамтран ажиллаж, хохирлын үнэлгээг хиймэл дагуулын зураглал, газар дээрх хэмжилт, судалгаа, лабораторийн шинжилгээ, нотлох баримтад үндэслэн хуульд заасан аргачлалаар гүйцэтгэнэ.

Яамны мэдэгдэлд дурдсанаар хохирлыг зөвхөн шатсан талбайн хэмжээгээр бус, хөрс, ус, ургамал, амьтан, ховор болон нэн ховор ургамлын амьдрах орчин, экосистемд үзүүлсэн нөлөө, урт хугацааны экологийн үр дагаврыг хамруулан үнэлэх юм. Үнэлгээгээр экологийн болон эд хөрөнгийн хохирол, түймэр унтраахад гарсан зардал, байгаль нөхөн сэргэх боломжийг тодорхойлж, цаашид нөхөн сэргээлт хийх, түймрээс урьдчилан сэргийлэх арга хэмжээний үндэслэл болгоно гэж яамнаас онцолжээ.

Найм хоног үргэлжилсэн түймэр

Түймэр Халхгол сумын Цогтсүмбэр багийн нутаг «Бичигтийн-Өндөр» хэмээх газарт 10-р сарын 8-ны 11:55 цагт гарсан тухай дуудлага ирсэн бөгөөд 10-р сарын 12-нд цурамд оруулжээ. Онцгой байдлын байгууллага, хилийн цэрэг, дархан цаазат газрын хамгаалалтын алба хаагчид, орон нутгийн иргэд оролцсон түймэр унтраах ажиллагаа 10-р сарын 16-нд дууссан гэж iVoice, Синьхуа мэдээлэв. Синьхуагийн мэдээлснээр гурван аймгийн 606 хүн, 100 техник түймэртэй тэмцэж, түймэр хилийн зүг тархах үед Хятадын эрх баригчид хилийн дагуу 3,400 гаруй гал сөнөөгч, аврагч байршуулжээ.

iKon.mn-ийн мэдээлснээр Нөмрөгийн дархан цаазат газар 587.7 мянган га талбайтай бөгөөд энэ нь Улаанбаатар хотын есөн дүүргийн нийт нутгаас том юм. Тус газар цаа буга, баавгай, зэрлэг гахай зэрэг амьтдын амьдрах орчин гэж Синьхуа тэмдэглэжээ.

Шалтгааныг хууль хяналтын байгууллага шалгаж байна

Хил хамгаалах ерөнхий газрын мэдээлснээр Сүмбэр боомтыг өндөр хурдны шилэн кабельд холбох арга хэмжээний нээлтэд оролцсон боомтын захиргаа, «Мобиком» корпорацийн удирдлага, орон нутгийн иргэд зэрэг 13 хүн, таван автомашинд 10-р сарын 6–8-нд хилийн бүсэд нэвтрэх зөвшөөрөл олгосон бөгөөд тэдний санамсар болгоомжгүй байдлын улмаас автомашинд гал гарч, хээрийн түймэр болон өргөжсөн гэж iSee.mn мэдээлэв. «Мобиком» компани өөрийн баг тус бүсэд харилцаа холбооны ажил хийж явахад автомашин нь шатаж, түймэр гарсан гэж мэдэгдсэн гэж Синьхуа бичжээ.

Компанийн гүйцэтгэх захирал Ясүхиро Очи NTV телевизэд өгсөн тайлбартаа компанийн болон өөрийн зүгээс уучлал хүсэж, «Бид хариуцлагаас зайлсхийхгүй» гэжээ. Тэрбээр хохирлын хэмжээг холбогдох байгууллагын шалгалтаар тогтооно, шалгалтын дүн болон хуулийн хүрээнд хохирлыг барагдуулах арга хэмжээ авна гэж хэлсэн байна. Хууль зүй, дотоод хэргийн сайд Г.Тэмүүлэн холбогдох этгээдүүдэд хариуцлага хүлээлгэж, хохирлыг нөхөн төлүүлнэ гэж мэдэгдсэн. Галын шалтгаан, хохирлыг хууль хяналтын байгууллага шалгаж байгаа бөгөөд 10-р сарын 16-ны байдлаар хэнийг ч сэжигтэн, яллагдагчаар татаагүй байсан гэж iSee.mn мэдээлжээ.