Улсад АИ-92 бензиний 10 хоногийн нөөц байгаа бөгөөд нийслэлийн 264 ШТС-ыг benzin.mn-д холбожээ

Энэ тухай Аж үйлдвэр, эрдэс баялгийн яам (АҮЭБЯ) мэдээлж, дэд сайд Б.Мөнхтамир хуралдааны талаар мэдээлэл өгөв. Яамны мэдээллээр АИ-95 бензин 2,079 тонн буюу 17 хоногийн, дизель түлш 108 мянган тонн буюу 27 хоногийн, онгоцны түлш 7 мянга орчим тонн буюу 34 хоногийн нөөцтэй байна. Долоо хоногийн өмнө буюу 10-р сарын 12-нд АИ-92 бензиний нөөцийг 14 хоногийн хэрэглээнд хүрэлцэхүйц гэж мэдээлж байжээ.

Захиалсан 78 мянган тонны 38 мянга нь иржээ

Энэ сард ОХУ, БНХАУ болон гуравдагч орноос нийт 78 мянган тонн АИ-92 бензин импортлохоор төлөвлөснөөс 38 мянган тонн нь орж ирээд, үлдсэн нь замд тээвэрлэгдэж байна гэж яамнаас мэдээлэв. Дэд сайдын хэлснээр БНХАУ, БНСУ-аас АИ-92 бензин нэмж авах хэлцлүүд хийгдэж байгаа бөгөөд энэ сарын сүүлээр дотоодын компаниуд БНСУ-ын талтай хамтын ажиллагааны гэрээ байгуулахаар ажиллаж байна. Дотоодын шатахууны хэрэглээ одоогоор ердийн үеийн түвшинд байгаа гэж тэрбээр хэлжээ.

Монгол Улс шатахууны хэрэгцээгээ импортоор хангадаг бөгөөд ОХУ-аас ихээхэн хамааралтай. Засгийн газар 10-р сарын 7-ны хуралдаанаараа Замын-Үүд, Булган, Шивээхүрэн боомтоор импортлох 92 октантай автобензин, дизель түлшний гаалийн албан татварыг 2026 оны 10-р сарын 21-нээс 2028 оны 12-р сарын 31 хүртэл тэг хувь болгосон.

Үнийн өсөлтийн үндэслэлийг шалгаж байна

АИ-92 бензиний жижиглэнгийн үнэ 10-р сарын 12-ноос литр тутамд 500–550 төгрөгөөр нэмэгдсэн. Шуурхай штаб 10 хоногийн өмнө компаниуд үнээ үндэслэлгүйгээр нэмсэн эсэхийг шалгахыг Монополын эсрэг газарт үүрэг болгосон бөгөөд тус газрын дарга Б.Амарсанаа ажлын хэсгийн эхний дүгнэлтийг өнөөдөр танилцуулав. Түүний хэлснээр АИ-92 бензинийг 9-р сард тонн тутмыг нь 873 ам.доллараар авч байсан бол 10-р сард 1,063 ам.доллараар авч байгаа нь урьдчилсан байдлаар үнийн өсөлтийн гол шалтгаан байж болзошгүй бөгөөд эцсийн дүгнэлтийг дараа гаргана.

Дэд сайд Б.Мөнхтамирын мэдээлснээр Цагдаагийн ерөнхий газарт шатахуунтай холбоотой 786 дуудлага, мэдээлэл ирснээс 431 нь хэрүүл маргаан, 36 нь бусдын эрүүл мэндийн эсрэг, 33 нь эд хөрөнгө устгаж гэмтээсэн, 23 нь шатахууныг шаглаж зарсан тохиолдол байжээ. ЦЕГ тухай бүрд нь зөрчлийн хэрэг нээн шалгаж байгаа аж.

Аль ШТС-д шатахуун байгааг газрын зураг дээр харуулна

Аль ШТС-д шатахуун байгаа нь тодорхойгүй байна гэсэн иргэдийн бухимдлыг шийдвэрлэхээр Ашигт малтмал, газрын тосны газрын (АМГТГ) системийг залуусын хөгжүүлсэн benzin.mn платформтой холбож, өнөөдрөөс нээлттэй ажиллуулж эхэлснийг дэд сайд мэдэгдэв. Улаанбаатарын 264 ШТС-д АИ-92, АИ-95, АИ-98 бензин болон дизель түлш борлуулагдаж байгаа эсэхийг вэб сайт, аппликэйшний газрын зураг дээр ногоон өнгөөр ялган харуулах ч компаниудын өрсөлдөөний нууцыг хамгаалах үүднээс бодит нөөцийн тоог харуулахгүй. Нийслэлийн Замын хөдөлгөөний удирдлагын төвийн сервертэй холбосноор ШТС-ын ойролцоох камерын бичлэгээр дараалал байгаа эсэхийг шалгах боломжтой болжээ.

Эхний шатанд компаниуд орлого, зарлагын мэдээллээ өөрсдөө оруулж байгаа бөгөөд 12-р сарын 15 гэхэд шатахуун хадгалах савны мэдрэгчийг системд шууд холбохоор ажиллаж байна. Яамны мэдээллээр түгжрэлийг бууруулахын тулд төв зам дагуух зарим ШТС-ыг тасралтгүй хангаж, 24 цагаар ажиллуулах, шатахууны чанарын лабораторийн шинжилгээний дүнг олон нийтэд нээлттэй мэдээлэхээр болжээ.