Дарханы 65 жилийн ойн барилдаанд улсын арслан Ц.Бямба-Отгон улсын аварга О.Хангайг давж түрүүлэв

Шигшээд улсын аварга О.Хангайг давав

Барилдаан Бямба гарагт, аравдугаар сарын 17-нд Дархан-Уул аймгийн Дархан суманд болсон. Үндэсний бөхийн барилдааны дүнг бүртгэдэг devjee.mn-ийн мэдээллээр 128 бөх долоон даваагаар барилдаж, нийт 127 барилдаан болжээ.

«Их Монголын Хүчтэн» дэвжээний бөх, улсын арслан Ц.Бямба-Отгон долоон даваанд бүгдэд нь ялалт байгуулжээ. Тэрбээр дөрөвдүгээр даваанд аймгийн арслан Н.Өсөхбаярыг, дунд шөвгийн даваанд улсын харцага Б.Түвшинтөгсийг, их шөвгийн даваанд улсын арслан Э.Батмагнайг, шигшээ барилдаанд «Аврагч» спорт хорооны бөх, улсын аварга О.Хангайг тус тус давсан байна.

Их шөвөгт хоёр улсын цолтон шалгарав

Их шөвгийн байрт Баянхонгор аймгийн Жинст сумын харьяат, «Алдар» спорт хорооны бөх, улсын арслан Э.Батмагнай болон Өвөрхангай аймгийн Зүүнбаян-Улаан сумын харьяат, «Алдар» спорт хороо, «Их Монголын Хүчтэн» дэвжээний бөх, улсын харцага Б.Цэдэнсодном нар шалгарлаа. Үзүүрлэсэн О.Хангай их шөвгийн даваанд Б.Цэдэнсодномыг, дунд шөвгийн даваанд улсын начин О.Цэцэнцэнгэлийг давжээ.

Дунд шөвгийн байрт улсын начин О.Цэцэнцэнгэл (Хэнтий, Баянхутаг), улсын арслан Э.Оюунболд (Хэнтий, Өмнөдэлгэр), улсын начин Н.Амгаланбаатар (Дундговь, Эрдэнэдалай), улсын харцага Б.Түвшинтөгс (Булган, Хишиг-Өндөр) нар шалгарсан байна. iKon.mn-ий мэдээлснээр түрүүлсэн бөхөд 10 сая, үзүүрлэсэн бөхөд найман сая, их шөвөгт шалгарсан бөх тус бүрд таван сая төгрөгийн шагнал олгожээ.

Энэ оны амжилт

devjee.mn-д бүртгэгдсэн энэ оны барилдаануудаас үзэхэд, Ц.Бямба-Отгон тавдугаар сарын 31-ний барилдаанд үзүүрлэж, наймдугаар сарын 22, есдүгээр сарын 27-ны барилдаануудад шөвөглөж байжээ. Харин улсын аварга О.Хангай энэ онд дөрөвдүгээр сарын 26, тавдугаар сарын 9, есдүгээр сарын 27-нд болсон барилдаануудад түрүүлсэн бөгөөд есдүгээр сарын 27-ны барилдаанд Ц.Бямба-Отгон шөвөглөж байсан юм.

Бөхчүүдийн цол, харьяалал, спорт хороо, дэвжээг devjee.mn-ийн бөхийн мэдээллийн санд бүртгэгдсэн байдлаар нь бичив.

Дархан хот 65 насаллаа

МОНЦАМЭ агентлагийн мэдээлснээр, Дархан хот байгуулагдсаны 65 жилийн ой энэ сарын 16-нд тохиосон. МАХН-ын Төв Хороо, БНМАУ-ын Сайд нарын Зөвлөлийн 1961 оны тавдугаар сарын 24-ний 196/260 дугаар тогтоолоор Дархан хотыг Улаанбаатар төмөр замын Дархан өртөөний дэргэд байгуулахаар шийдвэрлэж байжээ. 1994 оноос Дархан-Уул аймаг болж, төвийг нь Дархан сум гэж нэрлэсэн байна.